നാലുകെട്ട് - മഹേന്ദര്‍

കയറിയ ഉടനെ ഒരു പൂമുഖം
രഹസ്യക്കൈമാറ്റങ്ങളുടെ ഇടനാഴി
ആസക്തിയുടെ അകത്തളം
കണ്ണീരിന്റെയും പായ്യ്യാരങ്ങളുടേയും
കരിപിടിച്ച അടുക്കള

പ്രണയം ഇപ്പോഴും ഒരു
പഴയ നാലുകെട്ടുതന്നെ

ഉച്ചയുറക്കത്തിന്റെ മുഖം
അമര്‍ത്തിത്തുടച്ച്
ചിന്തകളുടെ ജടകെട്ടിയ മുടി വാരിച്ചുറ്റി
അടിച്ചാലും അടിച്ചാലും തീരാത്ത
മുറ്റം അടിച്ചടിച്ച്......

എങ്കിലും
എല്ലാറ്റിനും പിറകിലൊരു തൊടിയുണ്ട്
ഓര്‍മകളുടെ പച്ചതഴച്ച പിന്‍തൊടി
ഇടയ്ക്കിടെ
വര്‍ത്തമാനത്തിന്റെ ചെറുകിളികള്‍
സന്ദര്‍ശനത്തിനെത്തുന്ന
വെയിലിന്റെ നാണയത്തുട്ടുകള്‍ ചിതറിക്കിടക്കുന്ന
കാനല്‍ത്തൊടി

ആസക്തിയും കണ്ണീരുമൊഴിഞ്ഞ്
അതെപ്പോഴും ശാന്തസുന്ദരം തന്നെ

E-Mail :
imahi75@gmail.com